¿Cando e onde podo renovar a miña demanda?
Cando te inscribes como demandante de emprego recibes un Documento Acreditativo do teu Rexistro como Demandante de Emprego (DARDE), que é máis coñecido como "tarxeta". Nela figuran imprimidas unhas datas determinadas e preestablecidas nas que se indican os días exactos en que debes realizar a súa renovación ou selado.
É importante ter presentes as datas en que se debe renovar a demanda e, en caso de que prevexas que non poderás realizar a devandita renovación nesa data por causa xustificada e acreditable, debes poñerte en contacto con carácter previo coa túa oficina de emprego para analizar posibles alternativas.
Os medios que o Servizo Público de Emprego de Galicia pon á túa disposición para realizar a renovación da demanda son os seguintes:
- Presencialmente nas oficinas de emprego.
- Mediante pegada dactilar, a través dos puntos de información distribuídos pola xeografía galega. Para acceder a esta opción, primeiro debes acudir á túa oficina de emprego para que se realice a captación das túas pegadas. Podes ampliar a información sobre a sistemática de renovación nos puntos de información.
- A través da Oficina Virtual de Emprego deste Portal. Para acceder a esta opción, previamente debiches solicitar a alta na Oficina Virtual.